عائشة الماجدي تكتب.. يوميات لاجئة

نفسي في وصول مطار الخرطوم المتأخر داك علي وش الصباح !

أنوم في الطيارة ومع كرب رب بتاعت الهبوط دي أصحصح وأرجع الكرسي الملم شنطتي بتاعت اليد والجكت من الكرسي وأمسح وشي بموية من القارورة جنبي !
أطلع مرايتي من الشنطة أكحل عيوني شوية من شكل النوم بتاع الساعتين دا وأشوف لبانة من أخر جيب ..
فتحت الباب كدا أودع المضيفات مع بوسات وشكر وعلي طول في سلم الطيارة ..
يكون في برد شوية وشباب تحت الطيارة وشهم صبوح صباح الخير صباح الخير ..

أنتظر واحدة من الصاحبات تكون في الرحلة أرح نمشي بالباب البهناك عشان نتونس بلا كتمة باب الرسميات ال vip ما فيه ونسة وبهجة اتجاوزي ونعتذر …

نركب مع ناس البص الكبير داك تميل تدقشك حديدة تميل يدقشك الباب مع النعاس ..
( انقنق مع صاحبتي الجابني بجاي شنو بحب الشقاوة كان مشيت بالباب داك كان بكون وصلت بيتنا هسي ) ..

المهم دفرة واحدة توش قدام موظفات الجوازات بكون يادوب مسؤول الوردية صحاهم الحواجب خط واحد وعيونهم مليانة نوم والزحمة تبدأ ..

المهم نقطع انا والمعاي ونسب المطار وشكلو ويناديني زول هناك يا زولة أمرقي المهم في النهاية نمرق ..

طبعًا قارورة الموية في يدي نقعد في الكراسي منتظرين الشنط
ودي قصة كمان لا الشنط في الصالة لا في الاتجاه التاني اي في طيارة نزلت ! إنتوا طيارتكم شنو ؟
رحلتكم ياتا !

اجي واحد من هناك يا بت الماجدي مالك بجاي ؟
يا حبيبنا جينا نكشّف بجاي ونتونس نتأخر شوية عشان الضوء يطلع وكدا !

في كراسي كدا نقعد فيهم بالله أسلم علي الصالة ( جت ) أي زول يكورك بت الماجدي أقابل بياااااااا هلا ومرحبا ..

المهم في نهاية الأمر بمرقوا لي شنطي لحدي الباب مع شوية عتاب ..

عاد يا يمة مرقة الباب من صالة الوصول تحلفي تقولي داخلة الجنة في ناس سمحييين كُتار بكونوا واقفين جنب الباب دفس جد !

واحد لابس جلابية والتاني محدر الطاقية وفي شباب سمحين هناك بكونوا واقفين وفي كم نفر بكونوا يقطعوا علي جنبة المهم ..

يلا تاني حبايبنا التكاسة ( يا أستاذة والله مشوارك مجان قولي خير بس ) انا عاد يا يمة بجبر الخاطر وارد عليهو شكرًا يا جميل ‘
المرة الجاية ان شاء الله عليكم ..

وأفج الخلق وأشوف عربتي الأصل وأقفة في المطار طول سفري
المهم يجيبوها لي وعاد الشباب ارفعك ارفعك الشنط
أصلو نص شنطي بكون كرور ولغوايس ساي ..

الدنيا بتكون علي أذان الصبح كدا ويلاااا يا شارع المطار كتح جد
بشوف ست شاي فتحت طوالي بقيف يمة صباح الخير !
عندك زلابية وشاي لبن ( خالتي بالله عليك انا بشرب بالكباية ديك الفيها يد ) أديها الفكه العندي كلها السوداني لسه أبليس بكون ما حضر لدسديس القروش ..
أطفح زلابية وشاي لبن وعلي البيت شتات خالي محطات فرملة واحدة قدام البيت وأسلم عليهم مغمضة ونومها واحدة للضهر 😞

الباقي بتموا بكرة ..

لعن الله الجنجويد وشتت شملهم وانزل عليهم البلاء والمرض
كان خربوا حياتنا ..

يوميات لأجئة 😭😭😭