كتبت الإعلامية السودانية المعروفة داليا الياس منشور على صفحتها الرسمية بموقع التواصل الاجتماعي فيسبوك اطلع عليه موقع الان نيوز الالكتروني الاخباري قالت فيه الخبر
السلطات المصرية تعلق نشاط كل الكيانات السودانية لحين إشعار آخر يتعلق بتقنين الأوضاع وطبيعة العمل وتبدأ بالعدد الهلامي الكبير للمدارس السودانية !
التعليق
تصرف أحمق من شخص تافه ممكن يضر بسمعة ومصلحة شعب كامل في ظروف عصيبة.
مستسهلين السلوك المنحرف والتنمر والمهاترات البيعملوا فيه ناس بلا ضمير أو وعي… وكلام سخيف بيقولوا فيه ناس ممكن يكونوا ما قاعدين في مصر أساساً!
ما كل الشعوب معظمها بيأذي نفسه وأولاد بلده… في شعوب عندها كلمة وتأثير وتقاليد وأعراف ووطنية وخطوط حمراء مابتقبل تجاوزها من أي زول!!
إنعدام الشعور بالمسؤولية تجاه نفسك وتجاه الآخرين ممكن يكون سبب ضرر عظيم أكبر من تصورك.
لمتين حنفضل بنعمل في روحنا كده؟!!
محتاجين شنو أكتر من الحرب دي عشان يصحوا جوانا الإحساس والأخلاق؟!!
(مصر) ما قصرت كانت أنسب وأفضل بلد… و(المصريين) عندهم حق… أسياد بلد وأرض…عاملونا بما يرضي الله… لكن نحن فينا ناس جاحدة ومكابرة ووهمية.. لو فاكرين الإستفزاز والعدائية بيحققوا لينا مكسب في أوضاعنا دي تكونوا كائنات غريبة.
لاحول ولاقوة إلا بالله… اللهم تولنا في من توليت.
انا كنت قايلة (حمدتي) براه الشال صباعه وطبز عينه!!
خموا وصروا.
د(اليا) س
