كيف تشتري سيارة مستعملة.. الان نيوز تقدم لك النصائح المطلوبة

اول حاجه لازم تسأل نفسك انت بتشتري عربية ليه ؟
و ايه بالظبط احتياجاتك ليها ؟
و عدد افراد اسرتك ؟
و متوسط المده الي هتقتنيها فيها ؟
المسافه المعتاد استخدام السياره فيها ؟
بعد كده تفضيلاتك في العريبه انها تكون سيدان عربيه بشنطه
ولا عربيه هاتش باك
ولا SUV
ولا دفع رباعي
السؤال الصعب ؟
الميزانيه الشهريه للعربيه كام ؟
تكلفة الصيانات الدوريه ؟
المبلغ المحدد لشراء السياره ؟
حدد الانواع يفضل الحد الاقصي للمقارنه ٤ سيارات
ابحث عن السياره علي الانترنت و شاهد التقارير الخاصه بها و جروبات الملاك حتي تتعرف عن السياره اكثر و تحدد العيوب الشائعه و الكماليات و متوسط اسعار قطع الغيار و سعر الصيانات و متوسط اسعار البيع و الشراء
كده عرفنا المميزات و العيوب و بشكل مبادئ عرفنا نرتب الافضل في السيارات المختاره و متوسط سعرها في السوق و اسعار قطع الغيار و الصيانات و افضل اماكن الصيانه و الفحص
#المتخصص
الخطوه الجايه انك تشوف حد من معارفك او الاقارب عنده خبره جيده او متوسطه في السيارات علشان دوره هيكون مهم جدا و هيوفر عليك فلوس كتير لو معندكش خبره في السيارات او خبرتك قليله و يفضل يكون موثوق في كلامه مش بيفتي
عملية البحث ( يفضل يكون يوم الجمعه صباحا )
معظم الناس بتاخد قرار البيع في اجازه و يوم الاجازه معظم المعروض بيكون سيارات من اصحابها مش تجار
حدد الاعلانات المعروضه و اختار احسن المعروض و يفضل يكون معروض بصور و اسلوب مش تجاري
قارن بين الحالات و الصور و رتبهم حسب الحاله
اختار افضل ٣ حالات
١
حدد المكان المناسب للكشف عن السياره و معرفة مواعيد العمل و هل فيه حجز مسبق للكشف
٢
تتفق علي معاد تشوف العربيات فيه و اهم حاجه يكون الصبح
نصيحه مهمه جدا جدا
عدم الذهاب ليلا لفحص سياره بيبقي صعب جدا تحديد عيوب و مشاكل دهانات السياره و الاماكن صعبة الاضائة
النهار له عينين
هنا بقي جه دور #المتخصص
تاخده معاك لفصح السياره فحص ميداني
اهم حاجه تكون العربيه نضيفه مغسوله مش متربه او متسخه
تقيم الحاله الخارجيه الصاج
بصه من بعد مناسب علي تفاصيل السياره من الخارج من حيث الفروقات بين الفواصل و مدى انظباطها من عدمه
الاكصدامات و العتب وظبوط لا مفارق و متلحم العتب من الاسفل مظبوط ولا مخبط
الوش مظبوط ولا مفارق و زعلان من بعضه
تاخد تقيم كام من ١٠
تقيم الحاله العامه للدهان
لون السياره و مدى تقاربه من بعضه ( ميه واحده ولا مفارقه لوحه)
البوبيه بشكل عام تاخد كام من ١٠

تقيم الحاله العامة الكاوتش و الجنط

حالة الجنط نظيف ولا في اصلاحات و الكاوتش ممسوح ولا كل فرده نوع تاريخ انتاجه محتاج يتغير ولا ممكن تمشي بيه
و تقيم من ١٠

تقيم الحاله العامة للصالون

نفتح السياره من باب السائق هل الدواخل فيها بويات كاوتش الابواب سليم ولا مقطوع الفرش نظيف ولا متبهدل و متكسر ده اكتر باب بيستهلك في السياره و بيحدد الحاله العامله للسياره و مدى نظافه صاحب السياره الازرار بتاعة الزجاج شغاله كلها ولا بتعلق و ممسوحه استجابتها و هل في اصوات عند طلوع و نزول الزجاج و هنجرب الموضوع ده مع كل باب لوحده و كلهم مع بعض
حاله الصالون العامه من كراسي و كنبه و ارضيات و سقف
فيهم تقطيع و حرق سجائر ولا نظيف
حاله الدركسيون و التابلوه فيهم تجريح او كسر
اهم حاجه تشوف الحجات دي كلها قبل لما تشوف السياره ماشيه كام كيلو متر علي العداد علشان لما تعرف الحاله العامه و تشوف العداد اما حتحس انه منطقي او هتحس ان في حاجه غلط

عربيه كسر زيرو و الصالون متبهدل و ازرار ممسوحه تعرف ان العداد ده ملعوب فيه و تعرف ان اهم حاجه في الموقف ده (اجري يا مجدي)
و متبصش وراك ده نصاب

نور الصالون و السقف و لو في فتحة سقف جربها في كل الاتجاهات فيها اصوات محكمه ولا فيها اثار مياه و تبص عليها من بره وهي بتقفل و تفتح مظبوطه ولا فيها مشاكل
التابلوه العضو الاهم في الصالون
الحاله العامه سليم فيه تجريح او كسور بيتهز ولا محكوم في مكانه
في اثار محاولات فك عند الحواف شكله العام مظبوط ولا مفكوك قبل كده
الازار ممسوحه شغاله ولا فيها حجات بايظه العداد
سليم ولا بايظ الانوار شغاله كلها ولا في حجات مطفيه
اللمبات المهمه شغاله
فحص المحرك
الوسادات الهوائيه
التحكم في الفرامل
التحكم في الثبات
لو فيه واحده فيهم شغاله مؤشر مش كويس
لمبات التابلوه شغاله كلها ولا فيها حجات مطفيه

العنصر الاهم في التابلوه
التكيف
لازم لازم لازم يكون شغال و بيسقع
ملحوظه
( اصله شغال و عايز يتشحن – ده محتاج كمبريسور او كباس بس )
كل الكلام ده مش مؤشر كويس و غالبا بايظ و صيانته بتكلف مبلغ محترم

قيم الصالون كام من ١٠

تقيم الحالة العامة للمحرك و الحوض السياره

عريس الليله الموتور او المحرك
افتح الكابوت او غطاء المحرك
لو السياره بارده افتح القربه شوف في صداء في المياه او رشح زيت
خليك واقف بره و دور السياره واسمع صوت الموتور ناعم ولا خشن في اهتزازات و لا ثابت و من الداخل عدد لفات المحرك ثابت ولا بيهتز
دوس بنزين هل الاستجابه سريعه ولا متاخره في برجله ولا ثابت
شكل حوض السياره سليم ولا في تعاريج
اماكن تثبيت الرفارف سليمه و البطاحات شكله الموتور و توصيلاته سليمه ولا متقطعه و الفبر متكسر الموتور نظيف ولا معرق زيت و مبخر و متبهدل
مقياس الزيت حالة الزيت
حاله البطاريه بتظهر من لمبة البيان
و القواشيط مملحه
علبة الفيوزات مكسوره حالة الفيوزات
اسمع صوت الشكمان مظبوط ولا فيه مشكله
بيجيب مياه
اكتم الشكمان بايدك شوف العربيه هتبرجل
شوف ايدك عليها هباب او زيت او بنزين نى

الفتيس
الاوتوماتيكي
جرب الفتيس علي n و r و شوف سرعة الاستجابه و لو فيه هبده او رزعه دي مشكله
نفس القصه بسن n و d
وقت الاستجابه و لو في خبطه او رزع
جرب كل الغيارات بنفس الطريقه
و شوف بيانات الغيارات علي العدادات

الفتيس المانيوال
جرب الدبرياش لغايه الاخر شوف صوت المكنه اتغير ولا عادي و جرب تعشيق الغيارات سلسه ولا بتيجي بصعوبه
جرب تطلع بالعربيه براحه و شوف المجموعه فيها صوت و جرب تطلع علي التاني وشوف الاستجابه ايه و هل هتبطل جرب تطلع علي الرابع و انت شادد الهاند فرامل اليد لو طلعت تبقي محتاجه صيانه دسك واسطوانه دبرياش لو بطلت تبقي تمام

و قيمهم كل كده ٢٥

تقيم الحالة العامة للشنطه

( مقبرة الافيال في اي سياره)

الحاله العامه نظيفه ولا متبهدله
فيها اثار تعريج الفوانيس مظبوطه في مكنها ولا فيه فرق
الاستبن نظيف ولا بايظ و تاريخ الانتاج
العده و الكوريك و الطفايه موجودين

و قيم من ١٠

تقيم التحرك بالسياره

كده المفروض الحراره وصلت للوضع الطبيعي ليها و زياده يبقي في خلل في دورة التبريد و دي مشكله تخليك تبعد عنها
اقفل الزجاج بالكامل و اتحرك و اسمع صوت العربيه و المحرك في في اصوات تخبيط او ترزيع طقطقة كبالن صوت خشونه في التحرك
الملفات السياره مظبوطه ولا في اصوات
الفرامل مظبوطه ولا بتعوم العربيه وفيها اصوات
شغل التكيف شوفه ضعف عزم العربيه ولا الدنيا عاديه
جرب تسارع العربيه و شوف استجابتها كويس ولا فيها
مشكله
جرب الغيارات كلها في المشي و شوف مظبوطه ولا ملغبطه
جرب الانظمة المختلفة
سواء النظام الرياضي او الاقتصادي و شوف استجابة الفتيس ايه و هل في مشاكل ولا اداءه كويس

قيم من ٢٥

كده معانا تقيم كويس للعربيه من ١٠٠
اهم حاجه ان تقيمك السياره مينقصش كتير في
الحالة العامة للمحرك و الحوض السياره و التحرك بالسياره
# المتخصص للكشف و انت مطمن انك مش بترمي فلوس علي الارض

ملحوظات
بلاش بلاش تشوف عربيه رخصتها منتهيه حتي لو سعرها مغري
يرخصها و بعدين نشوف

بلاش تاخد عربيه مغيره موتور و لسه متثبتش علي الرخصه
بلاش تاخد عربيه متعدله من شباب صغير في السن اشتريها و عدلها انت بنفسك

الكشف ده علشان منكشفش علي عربيات كتير ده علشان نكشف علي سياره تستاهل الكشف