الفنانة كاشا النيل أتارو تكتب.. فضيحة (الجدعت توبا).. من العرس للخرطوم

بتّنا عوضية الله يعوّضنا غيرها.. عِرفت ليها واحدَن مسَهوك من اولاد العاصمة.. لمّه فيها فوق الجامعة.. الجامعة تطير الفي حد الوَطَا.. ما يسوُّ لينا جامعة هنا في حِلّتنا دي.. بناتنا ديل يقرَن قِدّام عِيونّا☹️

قالت (اوبن قاين) الشي الجابتو ده (كِـ ـويفِر).. بهدَل بتّنا بَهْدول.. أولاً بي التّبادي يوم العرس جابلها زفاف.. غربال.. شاشايه!.. يدّيها برّة.. وراسمة الحِنّة في رقبتا اتّقول عايشين في تلفزيون و قاصّة شِعيراتا.. أيي!…تنقص يا ود العاصمة الكشفتا حالنا مع الحَلاّل.. من الهجمة والرّجمة لا قِدرنا نبشّر لا قِدرنا نزغرت.. الحفلة جَت نشيل ونتدّسدس من الكاميرا، جرينا بي ورا الصيوان عشان ما يصوّرونا!

قُمنا بي الدّس سمّيناها (الجدعت توبا) والرّويـ ـجل سمّيناهو (الحنيطير).. والكلام ده سِر!

بعد زمن ساقا العاصمة وتعالو شوفو الهملة والانطـ ـلاقة.. مشينا قعدنا معاهم ايام، عندنا زول عيّان جاتو (دودة الفرنديت)،ما تسعلوني جاتو كيف.. عليك امان الله بتّنا عوضية بقت كِـ ـويفرة تب!!.. حايمالا بي فسيتين قصير بت الطـ ـهور ااآبتلبسو..!

زعلة ساي جينا صادّين قُبّاال زولنا يتعالج.. العيان زاتو قال اخير ليهو المـ. ـوت من الشايفو ده!

اهلها حصلت ليهم وفاة.. خالتي تقع وتقوم وتترمّد بي التُّراب، جنـ ـس بِكا ومقاالدة، تعمِت ليك الواحدة تسرِخ ليها في اضانا فَت سرخة تفكّها طرشاء… وفي واحدة شالت الكانون كبّتو فوق راسا قايلاو (هبّود) ساي، راسا ولّع زي السّارينة قرّبت تلحق المـ ـرحوم.. عركنا ليها دومتها في الوَطَا قرّبنا نكـ ـسر رقبتا!

في نُصّ (الفَرنَغيتة) دي اهل المـ ـرحوم سمعو بي بتّهم جاية من العاصمة مع رويـ ـجلها المَسَهوَك للفاتحة.. جرو جري لِفوهُم في الكبري اللّتنين لبّسوهُم عبايات، خايفين من خالتي تنخسُن بي كلمة!

ويشيلو ويضايرو فيهُم من خالتي، بعد ساعتين قالو راجعين الخرتوم، موية البيّارة ما بتنفع معاهُم.. ليه؟..قاال المـ ـرا حُـ ـبلى.. قولة حُبلى دي لِقى خالتي تِحت اباطو!

وقالت كدِي خالتي في نصّ السّكلِي داك انجَعَرت:

حُبلى؟ عااد يا الله هييييي ود (الجدعت توبا) ما يجي بيشبه ابوهو (الحنيطير)..!