كتبت الإعلامية السودانية المعروفة داليا الياس منشور على صفحتها الرسمية بموقع التواصل الاجتماعي فيسبوك اطلع عليه موقع الان نيوز الالكتروني الاخباري قال فيه ياجماعة فى فجوة لغوية حقيقية بينى وبين أولادى رغم عمق صداقتنا الحمد لله…. كلام عادى من صميم المجتمع العشته لما أقوله ليهم مابيفهموه وبيضحكوا فينى… وبحتاج أشرح ليهم مسميات بسيطة شديد مع إنهم إتولدوا وإتربوا وإتلطشوا معاى فى بلدنا الغالية يحليلها 😢😢
يعنى الليلة مثلاً ضربت لى محمد قلت ليهو عايزة لى ( كورس بتاع مضاد حيوى) 😊
قال لى : (ياأمى…الكورس ده سجلى ليهو أون لاين ياخ)!!! 🙄
وقبل كم يوم قلت لى لمار (تعالي كوسى لى نعلاتى) وقفت دقيقتين بتعاين لى وأعتقد خطروا ليها مية فكرة 😅
وقبل مده كنت مرهقة والرماتويد منفعل معاي فناديت إلفة وقلت ليها (مسدي لي كتافيني) فعقدت حاجبيها!! 😕
والأمثلة كتيييرة لكن ما مستحضراها الان…
فى زول عنده المشكلة دى؟!!
أحكوا لينا مواقفكم.
د(اليا) س
#ملحوظة
(كورس) للناطقين بغيرها يعنى (شريط/جرعة) 🙄
(كوسى) يعنى (فتشى/إبحثى)
(نعلات) يعنى (شبشب/حذاء)
(مسدي) يعني (ماعرفتها شنو والله إحتمال مسجي)
(كتافيني) يعني (أكتافي)
