قيادي اسلامي رفيع يتهم الرئيس السابق عمر البشير بالخيانة العظمى ويقول “البرهان يقعد بس”

شن القيادي الإسلامي الشبابي المعروف منجد احمد الداتر هجوم عنيف عبر منشور على صفحته الرسمية بموقع التواصل الاجتماعي فيسبوك اطلع عليه موقع الان نيوز الالكتروني الاخباري على الرئيس السابق عمر حسن احمد البشير والمكتب القيادي للمؤتمر الوطني حيث قال

البرهان ، البشير ومكتبه القيادي

جوهو خاشين بعد صلاة الصبح قالو ليه دايرين نعمل تغيير قاليهم ابقو عشرة علي البلد وسلمها ليهم وواصل جلسته عادي ••
دا البشير الزاهد في السلطة الذي حكم تلاتيت سنة وكل ما تنتهي دورته اعمامنا بتاعين فتل وشتل القوانين يفتلو ليه دستور انتقالي يحكم تاني لحدي ما فتر زاتو ••

ياخ الزول لو دايرين يشيلو منه سفه سفه صعود ما بشيلوها بالطريقة دي خلي سلطة بلد كاملة !! ••
يعني البشير دا ما عاين لأي تفاصيل ولا فكر في المستقبل ولا فكر في تداعيات القرار دا ؟؟
دي الحتة الاعمامك ما دايرين الناس تناقشها خامين الناس انو دا تغيير متحكم فيه وانو من مصلحة الحزب اونو ورجغ ورجغ ورجغ ••
التغيير الحصل دا جريمة مكتملة الأركان مفروض يتحاسب فيها البشير وأعضاء المكتب القيادي للمؤتمر الوطني حساب عسير يرتقي لدرجة الخيانة العظمي ••
كيف تسلم البلد بالطريقة دي وانت جيت بتفويض انتخابي ٢٠١٥ بغض النظر صاح غلط دا تفويضك ••
مفروض يا تسلمها بانتخابات يا تقاتل من أجل النظام الدستوري لحدي النهاية وزول بسالك مافي دا حقك القانوني ••
او علي الاقل تدعو لانعقاد المجلس الوطني وتخليه هو اليتخذ القرار ياخ اقل شي خليه يبقي قرار مكتب قيادي للمؤتمر الوطني ..
لكن يا بشة تسلمها كده بس ساااااي دون النظر للعواقب ( هاكم ليها ) ••
لقد تعامل البشير بلا مبالاة منقطعة النظير مع سلطة ثبتت أركانها بتضحيات الملايين ••
دايرين تجو تلومو البرهان عشان بثبت في أركان حكمه ؟؟
قناعاتي البرهان دا ما زي البشير وما ح يسلمها باخوي واخوك زول جاء كده بس ( حنك بس ) لا انتخابات لا استفتاء وقاعد شغال قدرته ( عليك الله في شفتنه اكتر من كده ) ••
ودا الكلام الصاح مافي زول بسلم ليه سلطة ساي كده ••
هسي البرهان دا لو سلم السلطة ايام حصار القيادة بداية حرب ال دقلو تخيل كيف يكون الحال ••
والله العظيم لأصبح السودانيين كلهم أما لاجيئين أو رقيق تحت أحذية ال دقلو ؟
عشان كده مهما فعل البرهان من حيل و خدع واخفاقات يبقي دا الخيار المتوفر حالياً تختلف تتفق دا العندنا ••
نحن ك مواطنين نعمل شنو يعني ؟؟
يعني انت تترك السلطة ومؤسسات الحكم وتقول أنا انسحبت ما داير اقـتل زول و تسليمك للسلطة يتسبب في فساد دين ودنيا السودانيين وخراب منشآتهم وقـتلهم وتشريدهم و ••• الخ
البرهان ما ح يعمل ليك مشروع حضاري لكن علي الاقل يحافظ ليك علي شكل الدولة لحدي ما انت بتاع المشرع الحضاري دا تعمل نقد ذاتي لتجربتك وتقدم قيادات جديدة ••
حتي ذلك الحين نقول البرهان يقعد بس