فبركة “دقلو فوق ياناس”.. عائشة الماجدي تدافع عن الفنانة انصاف مدني وتقول…..

كتبت الإعلامية عائشة الماجدي منشور على صفحتها الرسمية بموقع التواصل الاجتماعي فيس بوك اطلع عليه موقع الآن نيوز الإلكتروني الإخباري قالت فيه لا تظلموا انصاف —الظلم ظلمات وتغيير الكلام على لسان الزول أسهل طريقة لاغتياله

شفت و سمعت من الفيديو المتداول لحفلة إنصاف مدني في الإمارات هي غنت الكوبليه المعروف: ( النقده فوق يا ناس )

دي أغنية قديمة والناس كلها بترددها في الحفلات لكن اتحولت فجأة بفعل مصححين الميديا وصٌناع مهرجان الظلم وإغتيالات الشخصية وبقدرة قادر لي ( دقلو فوق يا ناس ) في بوستات وتسجيلات مفبركة واتوزعت كأنها حقيقة لتشويه سمعة انصاف

وتوليفتها ع متعاونين المليشيا مثلاً ..

السؤال: ليه؟

لأنو في ناس شغلهم ما الفن ولا الموقف السياسي شغلهم الصيد في الموية العكرة بس ياها شغلتهم عطالي قاعدين يلفقوا عبارة يشعلوا النار ويتفرجو على الزول وهو بيتحاكم في ساحة السوشيال ميديا قبل أي محكمة..

إنصاف عندها مبرراتها لقيام الحفلة ممكن نتفق أو نختلف معاها. لكن تتحاكم على كلام ما قالته؟ ده ظلم صريح ونهج حريق كعب

والمؤسف إنو ( أصحاب الأقلام الحمراء ) ديل ما بيقفوا عند إنصاف مدني بكرة يجي دور زول تاني، والتالت، لحد ما البلد تبقى كلها شك واتهام وتلاسن في الميديا …

بالمناسبة إنتو حضنتو ناس قتلوا عديل وجيتو تشتغلوا على المسكينة انصاف عشان غنت أغنية وانتوا بمزاجكم حبيتوا تسمعوها غلط ؟ غايتو البلد دي ( المعيار اتكسر وفيها والكيل بقى بمكيالين )

الخلاصة:—

اتأكد قبل ما تشير الفبركة بقت سلا’ح أرخص من الرصاص

خلي المحاسبة على الفعل الحقيقي ما على النسخة المفبركة منه إنصاف زيها زي أي فنانة تتنقد على موقفها من الغناء في الإمارات لكن ما تتظلم على كلام ما قالته ..

الدوائر بتدور فعلاً والظلم ظلمات واليوم على إنصاف وبكرة على غيرها.  والظلم لو سكتنا عليهو هسي بكرة ما حنلقى زول ندافع عنو

وبس

عائشة الماجدي