“عطالي سياسيين ما عندهم اي عمل” بأمر الإعلامية عائشة الماجدي.. أحزاب الكتلة الديمقراطية في فتيل
الخرطوم | الآن نيوز
هناك مجموعة من الشخصيات بتعاملوا مع البلد دي بطريقة صرفة الصندوق يتوافدوا عليه وقت يكون في تقسيم كراسي ويبتعدوا عنه وقت يحتاجهم للدفاع عنه ..
مجموعة ما تسمي بالكتلة الديمقراطية 90% منهم مما يعني ( البعض ) عبارة عن عطالي سياسيين ما عندهم اي عمل سياسي حقيقي يقدموا للشعب السوداني أذكر ان هناك واحد من المستشارين من رفاقهم كان بجيبوهم بالكمية ما الكيف يعني وقت يكونوا عايزين حشد السيد المستشار بناديهم وطوالي يجلسوا في فندق القراند هوليدي فيلا في بورتسودان زي الطٌلاب وأمسيات قاعدين في النجيلة شاي وقهوة ولما يخلص من حشدهم ينفض السامر ويعودوا لأماكن الترفيه تبعهم …
لم ينجز سياسي واحد ملف خارجي !
لم يعمل على تحييد دولة خارجية !
لم يكسبوا اي اختراقات خارجية في صالح السودان !
لم تأتي جولة واحدة لهم خارجية بثمرة !
#في الداخل —
لم يعملوا مؤتمر جامع لقواعدهم في الولايات !
لم يساعدوا في دخول المساعدات الإنسانية للمواطنيين !
لم يستفيد منهم المواطن الذي يتحدثوا بأسمه في شئ !
قبل تحرير الولايات لم يزور سياسي واحد منهم المواطنيين في
معسكرات القضارف ولا كسلا ولا غيرها …
أنا مع العمل السياسي الجاد والتعافي الوطني يتمثل في الحركة السياسية المسؤولة لكن هؤلاء اشخاص بلا قيمة يتحركوا بمؤثر
او قول بكنترول ..
البعض منهم ما عنده رأي عديل يخجلك لما تتناقش معاه …
وبالمناسبة يبدو ان أعمامك الفوق ديل ما شايفنهم من الاساس
يلعبوا بيهم في الليق وبلعبوا مباراة التأهل بساسة رمم القحات
#وبس
( مرات في زول بكون بعمل ليك كل شئ وقريب منك لكن انت ما بتحبه وفي زول هناك بعيد و صانع ليك الوجع لكن على قلبك زي العسل وبتحبه ) ..
يلا دي المعادلة الحاصلة حالياً بين السياسين واعمامك ديل والمستشار
