توضيح من ود الصول بسبب مقطع صوتي مع قائد المليشيا ابو عاقلة كيكل

الأعتراف بالخطأ فضيلة وخير الخطائين التوابون..

اول الأخطاء المرتكبة مني في الوقت الحالي اني بررت اني لا أتبع لجهة سياسية ولا حتى عسكرية ومجرد مواطن عادي ،ولقب ود الصول دا جاي من مسطلح الشباب لما كنت جوكي ،وقلتها قبل اليوم اني كنت جوكي وكمساري وعافرت في الحياة دي واشتغلت في كل انواع الرزق الحمدلله وما عيب ابداً، ارجع للموضوع الاساسي وهو رسالتي الصوتية للمليشي كيكل السبب : ما ينفع احلف ليكم بالله اني لحدي ما نشرت البوست حق سرقة عربيتي من الجزيرة وقلت الحمدلله جات في العربية اني كنت متيقن تماماً ان عوض ربنا اكبر واكتر وكل ما يتقفل باب يتفتح باب تاني..

وفي نفس لحظة نشر البوست بساعة بالضبط لقيت اقرب الناس لي بسالني من سعر العربية عشان يعوضني بيها وحلفت ليهو ان انا تاني ما اشتري شي في البلد ما لم تنتهي الحرب دي ولاسباب كتيرة، قبل العربية اتسرق دكاني ونشرت الخبر ولقيت عوض ربنا وقتي ،وبعدها مقر المنظمة التعب فيهو تيم واجتهد اجتهاد كبير وبرضو ربنا عوضنا بالأفضل، طيب عشان ما اطلع من هدف البوست “التواصل كان عبر الاخ بشرى البطانة بحيث ان كيكل وبشري في معرفة سابقة بينهم قبل الحرب ف قام بشري اداني تلفونو فيهو الواتساب فاتح بالمحادثة المرفقة دي وقال لي وضح ليهو ردك ،لقيت ان هو بقول انا كوز وفي نفس اللحظة عربيتي في يدو ومعلومة اسرتي واهلي كلها عندهم هل اقدر اصرح او اشتم او انبذ واقول ليهم انا ما كوز لكن داعم الجيش وانت مرتزق ؟ مافي انسان بقدر يعرف الكلام دا ما عدا الانسان الكان في مناطق سيطرة المرتزقة ديل او انسان شالو كل ممتلكاته واخر امل كان عندو ياها العربية دي الجاي اتم بيعها عشان اتتم بيها زواجي، طيب دا الكلام الحصل كلو ولحدي اللحظة دي انا اهلي قاعدين في نفس البيت التمت منو سرقة العربية وانا وكلت امرهم لله عز وجل بعد البوست دا ولو حصل ليهم اي شي انا السبب لاني جيت احفظ سمعتي لخدمة عمل طوعي 8 سنين للبلد الما عملت فيها خدمة وطنية والعربية الكانت سبب كل القصص دي ما وصلتني..

أنا بعتذر اعتذار رسمي لكل الناس السمعت الريكورد وحست مجرد احساس بالاهانة في مقطعي الصوتي وبعتذر للجيش الحالياً بقاتل في الميدان من اجل رجعونا للوطن 🇸🇩

ثانياً بخصوص موضوع قافلة المناقل ،ما نكرت ابداً المبلغ المالي المنصرف علي تيسير القافلة وفصلت المبلغ المنصرف وللاسف الشديد غلطي الكبير اني استهونت لكل شيء مفترض يكون عليهو فاتورة مالية لان في لحظتها كنت بمسمى متطوع قبل تسجيل المنظمة في مفوضية العون الانساني والمنظمة حالياً فيها مكاتب متعددة محاسب مالي ومدير مشاريع و امين عام ونهاية كل مشروع براجعو شغلهم ورقة وقلم وفواتير، و رسالة لكل الناس المستقلين الترند لتصفية الحسابات الشخصية عافي ليكم لوجه الله تعالى استمرو وانا ما بقيف من المساعدة بلاقي في اي اتهام اجر وفي كل حالة اجر و زي ما بقولو الاجر تلاقيط ❤️