يوم جلحه عرد بي موتر خلى ناسه العمل العدائي او العمل الخاص بيعتمد نجاحه بنسبة 80% على المعلومة فكنا بنركز على المعلومة فعملنا اكبر شبكة مصادر بالتنسيق مع استخبارات المنطقه والفنية.
من اهم المهام بتاعت العمل الخاص تحييد القادة لانه المليشيا عموما زي مراح البهايم ورا القائد قطعت راس الثعبان شتت القوة
المهم جات معلومة من اكتر من مصدر انه جلحه جا بي قوة كبيرة انتشاره من داردوق ونبته والسامراب حسب الخطه
وانه هو متواجد في نبته مربع 3 وفي السامراب اماسينا ودا موقع العربدة سكر وبنقو وايس …..
فختيناهو اولوية
اثناء الكلام دا كان في انفتاح بالدفاع في الاتجاه الجنوبي والجنوبي الشرقي
اخر خدمه بقيادة م.اول هشام كانت في نهاية نبته شرقا ونهاية داردوق البيضاء شمالا في الظلط البمر بي مظلة داردوق للمويه العفنه الحاج يوسف
الخدمه دي من استلمت كان قلاقله كتيرة تدوين وهجوم ومحاولة اسقاطها مستمره
وكانت تعليمات القيادة انها ماتسقط باي حال من الاحوال فقدر مايكون في مشاهدات سواء بالليل بالصباح في اي زمن قائد ثاني السيد العميد علاء الدين بخش بالجهاز العمل الخاص اتحركوا اتجاه الخدمه… هشام نقوم نتجارى نلحق
الخدمه نسندها
اليوم داك بنجهز لي مامورية في اتجاه السامراب عشان نقرب من جلحه كنا كل يوم ناكل شارعين تلاته …
اثناء التجهيز نسمع هشام بالجهاز في مشاهدات وتحركات كتيرة اتجاه مظلة داردوق ومشاة قطعوا اتجاه البيضاء ومجموعات اتجاه نبته م 2 الذهبي والجهاز جااايط
هنا طوالي زدنا ذخايرنا وطلعنا عدة الشغل(رقشششه رابطين فيها مدفع b10)
واننظرنا دورنا😂
فعلا الاشارة الاولى للمسيره تطلع
الاشارة التاني العمل الخاص يطلع
والمرة دي الاشارة من قائد ثاني للشرطه وللملازم اول محمد ميرغني ودا عندو تيم كارب محتاج مجلدات لبطولاتهم
المهم اتحركنا جري واتكاملنا مع هشام وخشيت لطاقم المسيرة في الخاص عشان يورونا المشاهدات
قال لي تتذكر يوم اللستك يلا دا اكعب😂
وبدا يفصل لقينا انه في اكتر من الف ديل مشاة وفي عربات مقاتله كمية في مربع 3 نبته وفي مشاة خشو اتجاه البيضاء
وعندهم قوة متحركة من السامراب بشارع جنوب البجيبك مع المنفله البتوديك الحاج يوسف
والتدوين المعادي شغال
نحن قوتنا سرية الشرطه العدد اقل من سرية كلها حوالي 70 وتيم محمد ميرغني 14 وهشام عندو سرية في الخدمه ودي تعليماته ماتتحرك شبر وعندما اربعه عربات دوشكا ورقشه b10😂
قعدنا انا ومحمد ميرغني وهشام عشان نشوف اليبقى شنو فهشام كان رايه الناس تتمسك بالموقع وتامنه وانا ومحمد ميرغني راينا لو انتظرناهم بسقطوا الموقع لانه عددهم كبير وتدوين وعربات الافضل نهجم قبل يهجموا
فاتفقنا علي الخطتين هشام يتمسك بالموقع ماعندو دخل بينا نحن مهما حصل مايتحرك ومعاهو 3 عربات والرقشه
محمد ميرغني تيمه زايد فصيله من قوتي زايد عربية يتسلل يصل التناكر المعطله جنب طلمبة شرق يكمن هناك
انا بي باقي القوة اتسلل شرق جغرافي بالمزارع الفي نهاية البيضاء اجي من ورا العدو من شارع القيامة اسوقهم شرق غرب عشان يطلعوا في الشارع الرئيس في مرمى نيران هشام والبيطلع حي يقع في شرك محمد ميرغني ومنها انا اكون قافل الاتجاه الشرقي ودا فزع شرق النيل كبري فريق وشارع باسقات وهشام يقفل ضهرنا في البيضاء ونبته ومحمد ميرغني يقفل غرب ودا شارع فزع العذبه والسامراب…
واتوكلنا علي الكلام دا
قائد ثاني خش بالجهاز وانه ماف زول يتحرك وكلنا نقعد نامن الموقع (ودي اتذكروها بعدين) المهم نحن كضباط ميدان قدرنا موقفنا وشفنا الاسلم خطتنا
واتوكلنا كل زول في مهمته
نحن اتسللنا بالمزارع ودا بعد المسافه لكن ماف حل غير كده لحدي ماجينا قصاد شارع القيامه بدينا التوغل جنوبا لحدي ماجينا قصاد سوق داردوق وتامين ضهرنا كان فرد واحد بي قرنوف ومساعده لانه كنا محتاجين للكل عشان نقدر نغطي المساحه
وفعلا لقينا العفن ديل زي غنم الاشلاق في ضل الحيط وكتار لكن مشاة من غير عربات بعد استطلعنا كويس قلنا بسم الله وفتحنا ذخيرتنا فيهم دفعه واحده اربي جي داقي قوم في مظلة دكان قرنوف داقي كوم في ضل شجرة والكلاشات دي تغطيه للاسلحه المعاونه وتامين ساي لانه المدى لسه ماوصلنا وبنضرب ومتقدمين
هم هنا حساباتهم جاطت فوق تحت مامتوقعين انه دا يحصل خصوصا من الاتجاه دا فجروا اتجاه الكمين وارض القتل الاخترناها ليهم
اول ماطلعوا الظلط الb10, والدوشكات والقناصات دورت فيهم والبقبل ورا بلقانا نحن فماف حل غير يواصلوا جري
اها الطلع حي لقى محمد ميرغي ومرمى نيرانه كان جنوب وقدامه فسحه كبييييره اي زول جا جاري منهم بجي بيها
هنا غيرو المواجهة بقو يجرو علي نبته مربع 2 فطوالي اتاكدنا من ضهرنا نضيف قدمنا قوة من هشام استلمت مواقعنا واتكاملنا القوتين اتقدمنا اتجاه نبته وسقناهم جنوب ومع نهاية نبته م2 ياداب ظهرت العربات ونحن متقدمين اجهزتنا كلها في القناة الخاصه والزمن داك المسيرة فوق والعدو اتجمع باعداد كبيرة في مربع 3 تحت الهياكل والمباني وعندو فزع كبير جا من اتجاه الحاج يوسف وشرق النيل وعندهم قوة كبيرة في اللستك السامراب
المهم نحن دا كله ماشايفنه ولاعارفنه وقفنا في نبته م2 وانه بنتناقش نتقدم مانتقدم راجعنا الذخائر وبدينا نرتب القوة في اللحظه دي مدفعية المعسكر اتعاملت بالكاتيوشا مع تقدمنا والدانة الاولى بينا وبينها اقل من 150 متر وطبعا حسب التعليمات مفترض اي مشاهدات هنا عدو وحسب قفلة الجهاز ماف زول بينتظر 😂
فطوالي رجعنا استلمنا موقعنا ونشوف هنااااك موتر فيه نفرين عرد باتجاه السامراب بعديها المدفعية دقتهم دق شين اتشتتوا وانسحبوا جزء اتجاه السامراب وجزء اتجاه الحاج يوسف قعدنا شوية في موقعنا فتحنا الاجهزه في القناة التانيه قائد ثاني دا قررررررب يسب عديل وشوية كده كان قلب منجلة الكاتيوشا قصادنا😂رجعنا اتكاملنا في الخدمه اتواصلنا مع المصادر انه اها الوضع كيف الناس ديل قنعوا برتبوا صفوفهم الفي شنو
ناس الحاج يوسف قالوا اول ماوصلوا اتشاكلوا وكله منك وكل من منو وخسرنا كتار والعربات مامرقتوها فزعتنا….
وناس السامراب الموتر الجا اول قبل الناس طلع جلحه وطنطن وسب وخش بيت ابا يطلع منه الا بالليل لاتجاه الحاج يوسف وتاني ماقرب من السامراب حتى جغم بربع كلبسه مستراح منه…
في الصورة الرقشه المبروكه في نفس الموقع مامورية تانيه
#الكترااااااااابة
