محمد ابراهيم الحاج يكتب.. عفوا سيدي الوالي… ماعايزين الخرطوم زي ماكانت
الخرطوم| الآن نيوز
دهت الخرطوم ايادي الغدر.. سرقت ونهبت ونكلت بأهلها… ودمرت مبانيها وطفحت الجثث من شوارعها وقلع تتار العصر اسلاك الكهرباء من تحت الارض في تدمير ممنهج للبنية التحتية وقصفوا محطات الكهرباء…
ماحدث بالخرطوم لم يكن لأهلها يد فيه… ولكن يمكن يكون عندهم يد في اصلاحها…
عفوا والي الخرطوم.. ماعايزين نضافة الخرطوم.. ولكن عايزين اصلاح الخرطوم من جديد…
الخرطوم اتهدت أمر لاجدال فيه.. لكن عايزين تتبنى من جديد…
عاصمة جميلة وقوية يحكمها القانون….
*عايزين اصلاح الشوارع مش نضافتها… وعمل شبكة مجاري…وليس (تلتيق) القديم.. وتتخت براميل نفايات في كل الشوارع…
عايزين شوارع مسفلتة من جديد مزروعة أشجار وزهور وخطة في ألوان وشكل الأبنية الجديدة.. ومعافبة الزول البيقطع شجرة او يتف في الشارع او يرمي ورقة او كيس..
* عايزين خرطوم خالية من الملاريا و الكوليرا.. دي امراض قديمة… تجاوزتها المجتمعات…
*
عايزين بيئة نضيفة.. موظفين بلدية يكونوا قدوة في النضافة و الهندام… مش مجرد الآت لتحصيل الرسوم والجبايات…
*عايزين اسواق مبنية بالطوب الأحمر ومرصوصة ونضيفة والنصاديق ماتمنح لي اي جهة الا بعد استيفاء شروط الصحة والاجازة…
*عايزين اسواق بشوارع نضيفة مافيها فريشة ودرداقات ومتسولين وشفع يطاردوك في كل حتة في الاستوب ات والمطاعم والمولات والاماكن العامة…
ماعايزين فواكه وخضار يتفرش في الأرض في نص الطين وخبوب الموية الوسخانة وموية الامطار المابتتصرف…
عايزين آمن اقتصادي قوي مافي زول يشتغل بدون تصاريح ولاحتي بتاع الكورنيش او ستات الشاي او بتاعين المهن الهاشمية..
*مافي اجنبي يعمل في مهن عندها ارتباط مباشر بالناس بدون مابستوفي شروط الإقامة وتصريح العمل في الخرطوم..
* ليه بلدنا دون عن بلدان الدنيا كلها اي زول ممكن يخشها اي زول ويطلع منها بدون اقامة وفيزا وفحص أمني؟
لقد لدغنا الأجانب في هذه الحرب كثيرا… علينا أن نتعظ مماسبق…
*عايزين عاصمة قوية بقوانين وصرامة…. ماعايزين الخرطوم القديمة بذات ازماتها و شوارعها الوسخانة وتسيب موظفيها…
*دي إجراءات مابتتطلب قروش كتيرة وميزانية ضخمة قدرنا تتطلب اجرءات صارمة وقوانين رادعة….
فالدولة هي من تفرض هيبتها ومسارها…لا الأفراد..
