للمرة التانية رئيس مجلس السيادة الفربق اول ركن عبد الفتاح البرهان قال بالدارجى الوااااضح ما تمنعوا اى سودانى من استخراج اوراقه الثبوتية، يعنى فى ادارة كبييرة مقندلة وعملت ليها صالة وكراسى وقيامة رابطة اسمها ادارة القوائم والحظر مفروض تتلغى وتشوف ليها شغلة تانية، الادارة دى وقبلها ادارة الجوازات كانت بتجيها قائمة يا من جهاز الامن او من السجون او من النيابة تفيد انو (X) من الناس محظور امنعوه من السفر، وعشان تفك الحظر بيدوك خطاب للجهة الحظرتك تتفاهم معاك يا انت المعنى او لا، وبموجبها تديك خطاب للجوازات والجواوات تديك ورقة مكتوب فيها (ليس معنى بالحظر)، اها بعد الحرب اللعينة دى قووووم يا تلات ارباع الشعب السودانى بقيتو محظورين ومشتبه بهم والناس الهربت من السجون بس يجيبو الاسم وهاااك يا تطابق الاسماء، اهااا الشغلانية كترت، ما تلات ارباعنا محظورين!! قاموا ناس الجوازات كبروا الادارة دى من كان عندهم مكتب صغير ادوهم حوش كبير وعملوا صالة كبيييرة وجابوا كراسى جلوس وظبطوا الصالة تظبيطة صاااح، لزوم احترام الانسان وصون كرامته (حقوق انسان وكده) وقاموا وسعوا الشغلة بدلا من حظر من السفر قالوا نمنعهم حتى من استخراج الجواز وتجديده واى اوراق ثبوتية اخرى نمنع (متينم زاتو) ولاننا عملنا ليهم صالة يقعدو فيها بدل يكونوا واقفين على حيلهم نفرض على اى زول نفك حظرو يدفع مبلغ 30 الف جنيه سودانى هى عبارة عن ورقة (A4) إطبعت منها ورقة واحدة بالكمبيوتر واتصور منها (30) مليون نسخة ما قلنا تلات ارباع البلد محظور اها بقت الادارة دى شغالة (رب رب رب رب) قالت لوزارة المعادن قووم وانا اقعد مكانك، عشان كده قدر ما رئيس مجلس السيادة قال ليهم ما تحظرو زول دى تعليمات وتوجيهات ما يشتغلوا بكلامه
عاد الرب رب رب ده يخلوه لى منو؟
والله المستعان.
