طالبت بإقالته فوراً.. السنيورة عائشة الماجدي تفتح النار على والي الخرطوم مجدداً (بطريقتكم دي زول برجع الخرطوم مافي)

في الخرطوم العاصمة القومية تصحى الصباح تفتح الماسورة تلاقيها قاطعة وتفتش الاعذار وتقول يمكن قطعة ماسورة عابرة لكن لما تسأل الجيران في القروب يجيك الرد البارد “يا زولة نحنا قاطعة عندنا ليها أسبوع” أسبوع كامل في 2026 في عز السخانة دي وهنا بتتذكر فجأة إنك عايش في ولاية عندها حكومة وعندها هيئة مياه وعندها ميزانية واجتماعات وتصريحات وبروتوكولات عندها كل شي في الدنيا إلا الشي الوحيد المهم اللي ما عندهم هو الموية نفسها …

والله دي اسوأ حكومة ولاية في ولايات السودان المٌحررة في توفير الخدمات موية وكهرباء وعلاج ..

▪️الوضع أصبح مؤسف فشل متراكم رغم توفر الميزانية لكن من يتابع حكومة أحمد حمزة الموقرة المفروض شغلتها الأساسية توفر لينا الحياة بقت هي السبب الأول في إننا بنفتش للحياة الناس بتصحى الصباح تفتش الموية بالكوارو وتنتظر الكهرباء بالساعات لما الناس تعبت ومراعاة لظروف الأٌسر الخاصة اشتروا طاقات شمسية بالقوة لكن المشكلة الأكبر ما في القطعة المشكلة في اللامبالاة المشكلة في ثقافة الكرسي اللاصق دا في أي دولة محترمة وزير او مدير هيئة مياه الموية تقطع عنده ثلاثة يوم بيقدم استقالته وبيمشي بكرامته لكن عندنا الموية قاطعة أسبوع في أحياء كاملة والمسؤول طالع في اي لقاء قدام الكاميرا بكل برود يتكلم عن التحديات وعن الخطط المستقبلية وعن صبر المواطن وصبرنا دا خلاص اتبخر مع الموية ..

ياخ فشلت قصرت ما قادر الباب يفوت جمل استقيل وخلي زول دمه حار وسخي ومٌتابع وتنفيذي قطع اخضر يجي يشتغل لكن لا الكرسي ما بتفارق والمواطن هو البيتبل في النص …

▪️يا حكومة أحمد حمزة الموية ما مشروع استثماري والموية

ما مؤتمر صحفي الموية حياة وصحة وكرامة لو ما قادرين توفروها على الأقل وفرو لينا الشجاعة شجاعة الاعتراف بالفشل وشجاعة الاستقالة بطريقتكم دي زول برجع الخرطوم مافي !

ترجع كيف لا موية لا كهرباء !

دا اسمه موت بالبطئ ومافي زول بجيب اهله وأطفاله وكـِبار السن عشان يقع في فخ زي دا

….

▪️اعتقد جازمة ان احمد حمزة خِلص مافي جرابه ورأيه كِمِل واصبح يٌكرر أفكاره القديمة

…

أقيلوا والي الخرطوم وحكومته ..

وبس