السلام عليكم ورحمة الله الاخوة والاخوات اعضاء قروبات موقع الان نيوز الالكتروني الاخباري على تطبيق الواتساب هذه الرسالة بمثابة تحذير وانتباه للجميع .. الرجاء تعميمها بقدر المستطاع وإرسالها لكل من تربطكم به صلة حتي لا يقع ضحية احتيال ونصب خبيث.
لو جاك إتصال عبر الواتساب وقال ليك أنا مشرف بتاع القروب الفلانى ودايرين نضمك للعضويه او انت معانا في القروب وذكر ليك اسم القروب وقال ليك عاوزين نعمل تحديث للقروب وحيجيك كود رسلو لينا وبعد داك أعمل كلمة سر.
أوعكم ترسلو الكود البيظهر ليكم أثناء المكالمه ومن الأساس ما تواصلوا مع هذا الشخص في الحديث او الدردشه لانه *محتال* وعلي طول اقطعوا الحديث واحظروا الرقم لانو الحاصل انو ديل *محتالين* عاوزين يخترقوا حسابك علي الواتساب ويدخلوا على حسابك من جهاز تانى.
أثناء المكالمه بيطلبوا من ميتا ترسل كود التحقق بتاع واتسابك وتقوم ميتا ترسل ليك فى تلفونك 6 أرقام كود التحقق تبع حسابك بالواتساب.
المتصل حيقول ليك ملينا ليهم .. أوعك تطلع زول على كود التحقق ولا حتى اقرب الناس ليك لانو الكود ده بيدى إمكانية التحكم بالواتساب والاطلاع على كل شئ عندك بالواتساب ويرسل ويدردش ويحتال ويرسل لقائمة الأسماء عندك ويطلب منهم مبالغ ماليه علي اساس انك محتاج ضروري ويعاكس وأحيانا ممكن يرسل صور إباحية لقروبات انت عضو فيها وكله بإسمك.
ياريت الناس تكون أكثر وعي حتي لو جاك رابط من شخص مجهول بالنسبه ليك طالب منك الانضمام الي قروب ما تشتغل بالرابط وما تدخل عبره لانه احتمال يكون *هكر*.
الناس يا جماعة لازم تزيد من الحس الأمني بتاعها لانه الزمن اصبح اغبر والناس ضمائرها ماتت واصبحت بدون اخلاق ولا يخافون الموت ولا يوم الحساب .. عموما وللعلم لو ورد ليكم طلب مالى عبر الواتساب من أى زول وارد جدا يكون الحساب حق الزول تم إختراقه وده *محتال* اول حاجه تعملها تتصل علي الشخص الانت بتعرفه عشان تتأكد انه هو صاحب الطلب اذا طلع هو خير وبركه وغير ذلك ما تتسرع تحول لاي شخص.
فأحذروا من كود التحقق وما تدوهو لى أى زول أياً كان الزول منو .. نسأل الله ان يصرف الاشرار ويهدي كل ضال ويحفظ الأمن والآمان.
ملحوظة
إدارة القروبات لا تتحمل مسؤولية أي إحتيال يتم من عضو في المجموعات لأن المجموعات عامة ولا نملك السيطرة على الاعضاء فقط يمكن تبليغ المشرفين برقم العضو المحتال وبدورهم سيعملون على إزالة العضو المحتال من المجموعات*.
